Sáðvörulisti ársins er kominn út og við hvetjum bændur og annað ræktunarfólk til að kynna sér úrvalið!

Sáðvörulisti Líflands er í stöðugri endurskoðun og á undanförnum árum hefur verið skýr áhugaaukning á hverskyns niturbindandi belgjurtum. Lífland hefur lagt upp með að fylgja þessari þróun grannt eftir og býður nú talsvert breiðara úrval belgjurta auk þess sem ýmislegt fleira hefur skilað sér inn á listann. Notkun belgjurta er ekki bara áhugaverð sakir fjölbreytni og fóðrunarvirðis margra tegunda af þessari ætt plantna. Belgjurtir binda verðmætt köfnunarefni úr andrúmsloftinu og miðla til svarðarnauta, þær mynda próteinfóður með háan meltanleika og eru duglegar að taka upp lífsnauðsynleg steinefni sem skila sér til búfjár. Notkun belgjurta er að endingu hreinræktað umhverfismál þar sem þær draga úr þörfinni á dýrum, langt að komnum aðföngum og auka sjálfbærni.

Ekki er loku fyrir það skotið að fleira forvitnilegt eigi eftir að komast á listann í aðdraganda vorsins og verður sáðvörulistinn uppfærður jöfnum höndum.

Þú getur nálgast sáðvörulistann hér en jafnframt bendum við áhugasömum á auknar og endurbættar upplýsingar um sáðvöruúrvalið í vefverslun okkar sem bætt er við jafnt og þétt.