Úrslit: Smákökusamkeppni KORNAX árið 2017
Vinningshafarnir:
Ástrós Guðjónsdóttir, 1. sæti (til hægri), Valgerður Guðmundsdóttir, 2. sæti (fyrir miðju) og
Sylwia Olszewska, 3. sæti (til vinstri).
Smákökusamkeppni KORNAX hefur verið fastur liður í aðdraganda jólanna hjá Líflandi síðastliðin ár. Frábær þátttaka var í ár og bárust okkur fjölmargar smákökur frá áhugabökurum sem kepptust um bestu jóla smákökuna sem inniheldur bæði KORNAX hveiti og vörur frá Nóa Síríusi. Dómarar í ár voru Albert Eiríksson, Tobba Marínós, Silja Mist Sigurkarlsdóttir og Magnúsína Ósk Eggertsdóttir. Vinningshafarnir hlutu glæsileg verðlaun og viljum við óska þeim innilega til hamingju með sigurinn og þökkum öllum sem tóku þátt kærlega fyrir þátttökuna!
Dómnefndin: Magnúsína, Tobba, Silja og Albert
Vinningshafi að þessu sinni var Ástrós Guðjónsdóttir með smákökur sem hún kallaði Piparsveinar. Sannkallaðar sælgætiskökur, frumlegar með passlega miklum pipar. Í verðlaun fyrir fyrsta sætið var KitchenAid hrærivél frá Raflandi, gisting í 2ja manna herbergi ásamt morgunverði á Hótel Selfossi, gjafabréf að upphæð kr. 40.000 frá Nettó, gjafabréf frá veitingastaðnum Bryggjunni Brugghúsi að verðmæti kr. 30.000, KORNAX hveiti í baksturinn, lífræn frjálshænuegg frá Nesbúi og glæsileg gjafakarfa frá Nóa Síríus.
Annað sæti hlaut Valgerður Guðmundsóttir með Versala kökunum. Alberti fannst hann kominn til Versala þar sem apríkósurnar koma skemmtilega á óvart. Fyrir þessar frábæru kökur fékk Valgerður gjafabréf að upphæð kr. 30.000 frá Nettó, gjafabréf að verðmæti kr. 20.000 frá veitingastaðnum Bryggjunni Brugghúsi, KORNAX hveiti í baksturinn, lífræn frjálshænuegg frá Nesbúi og glæsileg gjafakarfa frá Nóa Síríus.
Í þriðja sæti voru kökurnar Ljós sem hún Sylwia Olszewska bakaði. Saltkaramellufyllingin gerði þær alveg fullkomnar með kaffinu. Verðlaunin fyrir þriðja sæti var gjafabréf að upphæð kr. 20.000 frá Nettó, KORNAX hveiti í baksturinn, lífræn frjálshænuegg frá Nesbúi og glæsileg gjafakarfa frá Nóa Síríus.
Hér fyrir neðan má svo sjá uppskriftir þeirra sem lentu í fyrstu þremur sætunum:
1 .sæti - Piparsveinar
Höfundur: Ástrós Guðjónsdóttir
Uppskrift
Piparkúlukaramella
2 x Pokar piparkúlur frá Nóa Síríus
250 ml Rjómi
Aðferð:
Setjið piparkúlurnar og rjómann í pott, bræðið saman á miðlungs hita og látið þykkna í pottinum. Það getur tekið nokkrar mínútu.
Mjög mikilvægt er að hræra í pottinum allan tímann, annars er hætta á að karamellan brenni við.
Kælið í ísskáp ca. 4-6 klukkustundir til þess að karamellan nái að þykkna, en ekki lengur svo að hún verði ekki of hörð.
Kókosbotn :
125 gr KORNAX hveiti
125 gr sykur
125 gr kókosmjöl
125 gr smjör v/stofuhita
1 egg
Aðferð:
Öllu er blandað í skál og hrært saman. Gott er að byrja á því að hræra deigið saman í vél og þegar smjörið er byrjað að mýkjast þá er gott að taka deigið upp úr og hnoða það betur saman með höndunum.
Gerið litlar kúlur úr deiginu og fletjið aðeins út , setjið á plötu og inn í ofn.
Kökurnar eru bakaðar við 180°C í 5-7 mínútur (fer eftir þykkt kökunnar).
Þegar botnarnir og karamellan er tilbúin , þá smyrjum við karamellunni á botnana og hjúpum þá með suðusúkkulaði frá Nóa Síríus, einnig er fallegt að nota bráðið hvítt súkkulaði til skreytingar.
2. sæti - Versalakökur
Höfundur: Valgerður Guðmundsdóttir
Uppskrift:
2 egg
2 dl sykur
4 dl kókos
½ dl KORNAX hveiti
1 dl möndlur saxaðar m/hýði
1 dl apríkósur saxaðar
Aðferð:
Hitið ofn í 180°C, þeytið egg og sykur þar til létt og ljóst.
Blandið öllum hráefnum saman við með sleikju.
Setjið deigið á plötu með 2 x skeiðum ca. 1 tsk hver kaka.
Bakið í miðjum ofni í 10-12 mínútur.
Ofan á kökur:
150 gr NÓA SIRÍUS hvítir súkkulaðidropar
Aðferð:
Bræðið í vatnsbaði og dreifið hvítu súkkulaði yfir kaldar kökurnar.
3. sæti - Ljós
Höfundur: Sylwia Olszewska
Uppskrift
113 gr ósaltað smjör v/stofuhita
2/3 bolli sykur
1 egg stórt – (aðskilið)
2 msk mjólk
1 tsk vanilludropar
¼ tsk lyftiduft
1 bolli KORNAX hveiti
1/3 bolli Nói Síríus kakó
¼ tsk salt
1 bolli pekanhnetur
Aðferð kökur:
Hrærið smjör og sykur saman í stórri skál á miðlungshraða þar til það er vel blandað og mjúkt.
Bætið eggjarauðu, mjólk og vanilludropum saman við.
Setjið eggjahvítu í sér ílát inn í ísskáp.
Í miðlungsskál hrærið saman KORNAX hveiti, kakói og salti.
Bætið hveitiblöndunni rólega út í smjörblönduna og hrærið vel.
Breiðið yfir deigið og setjið í kæli í ca.1 klukkustund eða yfir nótt.
Hitið ofninn í 180° og setjið smjörpappír á ofnskúffu.
Þeytið eggjahvítur.
Mótið ca. 3 cm kúlur og dýfið hverri kúlu ofan í eggjahvítu, rúllið þeim svo yfir saxaðar pekanhnetur og setjið á ofnplötu.
Þrýstið létt í miðju hverrar kúlu þannig að það myndast hola í kökurnar.
Bakið í 12-13 mínútur.
Takið úr ofni, þrýstið létt í miðju kökunnar þegar þær eru heitar, getið notað skaft á sleif.
Leggið til hliðar, og þá skal gera karamelluna.
Karamella – uppskrift:
20-25 Nói Síríus töggur ljósar
3 msk þeyttur rjómi
Sjávarsalt (flögur) til að strá yfir.
Aðferð:
Setjið karamellur og rjóma í lítinn pott, bræðið yfir lágum hita.
Hrærið í pottinum allan tímann svo karamellan brenni ekki.
Þegar karamellan hefur þykknað og kólnað, setjið um ½ tsk af karamellu í holu á hverri köku.
Stráið sjávarsalti yfir kökuna eftir smekk og látið karamelluna kólna.
Súkkulaðitoppur uppskrift:
100 gr Nói Síríus suðusúkkulaði
1 tsk kókosolía
Aðferð:
Hitið suðusúkkulaði og kókosolíu í lítilli skál í örbylgjuofni í ca. 1 mínútu.
Takið út og hrærið, setjið aftur inn í örbylgjuofn ef þarf.
Þegar súkkulaði er bráðið setjið það í lítinn plastpoka og klippið lítið gat í hornið á pokanum.
Sprautið súkkulaði yfir kökurnar og látið kólna.