Þorkell Bjarnason starfaði sem hrossaræktarráðunautur Búnaðarfélags Íslands í 35 ár og hafði fulla yfirsýn yfir allt hrossaræktarstarf í meira en sextíu ár. 

Í Æviskeiði kemur fram margháttaður fróðleikur um öll helstu kynbótahross sem komu fram á sjónarsviðið á seinni helmingi 20. aldar.

Með ævistarfi sínu lagði Þorkell grundvöll að því ævintýri sem íslensk hrossarækt er löngu orðin. Með ræktendunum og samstarfsfólki sínu setti hann hásölum hrossaræktarinnar þá traustu hornsteina sem þeir hvíla nú á.

Æ fleiri hross sýna nú tilþrif og vinna afrek í anda draumsýnar og stefnu Þorkels um fagurskapaðan gæðing, auðveldan, geðgóðan og samstarfsfúsan – hinn ,,flugvakra klárhest“.

Bókina prýða um það bil 250 ljósmyndir. Henni fylgja nafna- og myndaskrár, sem auðvelda yfirsýn og tryggja notagildi hennar sem uppflettirits. Vonir standa til að bókin verði yndislestur flestra hestamanna.