Nú, þegar mörg hross eru í hagagöngu er mikilvægt að horfa til steinefna- og bætiefnafóðrunar. Íslenskan hagagróður getur skort ýmis mikilvæg stein- og snefilefni, t.d. selen og natríum og þarft að huga að réttri fóðrun. Í hönd fer landsmótsár þar sem vafalítið á eftir að reyna meira á hesta í þjálfun og brúkun og reynir þar einnig á fóðrunarþáttinn.
Laugardaginn 17. október býður Lífland til fræðslufundar um fóðrun hrossa. Dr. Susanne Braun dýralæknir mun miðla af víðtækri þekkingu sinni í máli og myndum auk þess sem söluráðgjafar Líflands verða á svæðinu. Susanne verður til skrafs og ráðagerða að loknu erindi sínu. Fundurinn verður haldinn í verslun Líflands við Lyngháls 3 í Reykjavík. Veittur verður 15% afsláttur af hestafóðri frá Líflandi og Pavo, auk tilboða á völdum bætiefnavörum fyrir hesta. Það verður að sjálfsögðu heitt á könnunni.
Dr. Susanne Braun er íslenskum hestamönnum að góðu kunn. Susanne hefur starfað sem dýralæknir á Íslandi í áratug. Hún er sérfræðingur í hestasjúkdómum og auk þess IVCA kírópraktor og reiðkennari ásamt því að vera alþjóðlegur íþróttadómari. Í doktorsritgerð sinni „Health status in Icelandic Horses in Iceland and after import in Germany“ rannsakaði Susanne fjölmarga lífeðlis- og næringarfræðilega þætti í íslenskum hestum, bar saman við efnagreiningar á fóðri hérlendis sem erlendis og kannaði meðal annars hvaða áhrif þeir hefðu á heilsu hesta við álag af völdum flutninga. Susanne vinnur mikið með blóðsýni sem hún tekur úr hestum og sendir út til greiningar og byggir fyrirlestur hennar að talsverðu leyti á niðurstöðum eigin rannsókna.